Pyatiqorsk Prokurorluğunun qarşısında terror aktı törətmək istəyən Mərkəzi Asiya vətəndaşı saxlanılıb.
İnterpress.аz xəbər verir ki, bu barədə Rusiya KİV məlumat yayıb.
Rusiya Federal Təhlükəsizlik Xidməti (FTX) Pyatiqorsk şəhər prokurorluğunun binası yaxınlığında planlaşdırılan dəhşətli terror aktının qarşısının alındığını elan edib.
Keçirilən xüsusi əməliyyat nəticəsində Mərkəzi Asiya ölkələrindən birinin vətəndaşı olan şübhəli şəxs saxlanılıb.
FTX-nin rəsmi məlumatına görə, xarici vətəndaş Suriyadakı hərbi kuratorlarının birbaşa göstərişi ilə hərəkət edib.
O, terror törətmək istədiyi prokurorluq binasının ətrafında kəşfiyyat aparıb və əldəqayırma partlayıcı qurğu hazırlamaq üçün lazımi kimyəvi komponentləri satın alıb.
Məlum olub ki, şübhəli şəxs terror aktını törətdikdən sonra təcili olaraq Suriyaya qaçmağı və orada fəaliyyət göstərən terror qruplaşmalarından birinin sıralarına daxil olmağı planlaşdırırmış.
Faktla bağlı terrorçuluğa cəhd və qanunsuz partlayıcı maddə dövriyyəsi maddələri ilə rəsmi cinayət işi başlanılıb, istintaq hərəkətləri aparılır.
Xuraman Etibarlı
İnterpress.аz
