İsmayıllı rayonunda atların kəsilməsi, ətlərin Bakı şəhərinə aparılması ilə məşğul olan şəxslər tutulub.
İsmayıllı rayon Polis Şöbəsinin və İsmayıllı rayon Baytarlıq İdarəsinin əməkdaşları tərəfindən anonim məlumat əsasında birgə keçirilən əməliyyat-axtarış tədbirləri nəticəsində Bakı və İsmayıllı sakinləri rayonun Mican kəndi ərazisində, çay kənarında gizlin şəkildə antisanitariya şəraitində 10 baş atı kəsərkən saxlanılıblar.
Müəyyən olunub ki, Bakı sakini Novruzov Süleyman Əziz oğlunun sifarişi ilə İsmayıllı sakini Ziriyev Vüqar Təşkilat oğlu və Bakı sakini Cəfərov Mahal Şamil oğlu tərəfindən İmişli rayonu Ağaməmmədli kəndi ərazisindən 10 baş at tədarük olunaraq “QazEL” markalı yük avtomobili ilə İsmayıllı rayonuna gətirilib.
İsmayıllıda heyvanlar qeyri-qanuni şəraitdə kəsilərək onların əti rayonun İsmayıllı kənd sakini İbrahimov Pünhan Mürsəl oğlunun həyətinə gətirilib. Sonra 400 kiloqram at əti satış məqsədilə minik avtomobili vasitəsilə Bakı şəhərinə göndərilib, qalan 400 kiloqram ət isə həmin ərazidə saxlanılıb. Bakının giriş hissəsində avtomobil saxlanılaraq at əti müsadirə olunub və müayinə olunmaq üçün Respublika Dövlət Baytarlıq Laboratoriyasına göndərilib. Laborator müayinələrdən sonra heyvan qidası üçün yararlı olduğuna görə, at əti Bakı Heyvanat Parkına göndərilib.
Faktla bağlı İsmayıllı rayon Polis Şöbəsi tərəfindən araşdırma aparılır.(apa)
İnterpress.azhttps://youtube.com/watch?v=aoDP9W_n0D0
