Kolumbiya prezidenti Qustavo Petro Venesuela ilə dialoqu inkişaf etdirmək üçün beynəlxalq konfrans təşkil edəcəklərini bəyan edib.
Bu barədə İnterpress.az xarici mətbuata istinadən xəbər verir.
“Cəmiyyət və Venesuela hökuməti arasında siyasi dialoqun effektiv kanallarını açmaq və yol xəritəsini yenidən qurmaq üçün Kolumbiyada beynəlxalq konfrans keçirəcəyik”, – Petro deyib.
Konfransın tarixi və təfərrüatlarını açıqlamayan Petro Venesuela hökuməti ilə müxalifət arasında dialoqun bərpasına dəstək verməyə hazır olduqlarını bildirib.
Müxalifət isə Venesuela xalqının insan hüquqlarının pozulmasına məruz qaldığını qeyd edərək, dərhal danışıqlar masasına qayıtmağa çağırıb.
Petro həmkarı Venesuela prezidenti Nikolas Maduro ilə avqustun 7-də hakimiyyətə gəldikdən sonra dörd dəfə görüşüb və müxalifətlə hökumət arasında mümkün danışıqları dəstəklədiyini bildirib.
Venesuelada hökumətlə müxalifət arasında sonuncu görüş 2022-ci ilin noyabrında Meksikanın ev sahibliyi ilə keçirilib, lakin çox az irəliləyiş əldə edilib.
Venesuela prezidenti Maduro müxtəlif vaxtlarda verdiyi açıqlamada müxalifətlə danışıqlara qayıtmağı səbirsizliklə gözləmədiyini, ölkəsinin beynəlxalq banklarda müsadirə edilən resurslarının hələ də çatdırılmadığını bildirib.
