İspaniyanın Şimali Afrikadan dəniz yolu ilə ən çox immiqrant qəbul edən bölgəsi olan Kanar adalarına son 30 gündə 13 mindən çox qeyri-qanuni immiqrantın gəldiyi bildirilir.
Bu barədə İnterpress.az xarici mediaya istinadən xəbər verir.
Kanar Adaları muxtar hökumətinin və Sahil Mühafizəsinin məlumatlarına görə, oktyabr ayında bölgəyə gələn qeyri-qanuni immiqrantların sayı əhəmiyyətli dərəcədə artıb.
Bu il Kanar adalarına gələn təxminən 28 min qeyri-qanuni immiqrantdan 13 mindən çoxu son 30 gündə qeydə alınıb.
Şimali Afrika sahillərindən gələn qeyri-müntəzəm immiqrantlar dənizdə xilas edilərək Böyük Kanarya, Tenerife və ya El Hierro adalarında Sahil Mühafizəsi qrupları tərəfindən sahilə çıxarılıb.
Hökumət Kanar adalarına gələn qeyri-qanuni immiqrantları buradakı bütün yerləşdirmə mərkəzlərinin dolu olması səbəbindən İspaniyanın digər muxtar bölgələrinə paylayarkən, İştirak, Sosial Müdafiə və İmmiqrasiya Naziri Xose Luis Eskriva 5 mindən çox qeyri-qanuni immiqrantın köçürüldüyünü açıqlayıb.
– Daxili işlər naziri Marlaska üç həftə ərzində ikinci dəfə Seneqala getdi Digər tərəfdən, daxili işlər naziri Fernando Grande Marlaska, qeyri-qanuni mühacir axınına qarşı tədbir görmək üçün üç həftə ərzində ikinci dəfə Seneqala gedib.
Marlaskanın bu gün Dakarda seneqallı həmkarı Sidiki Kaba və bu ölkənin bəzi yüksək rütbəli təhlükəsizlik qüvvələri ilə görüşəcəyi bildirilib.
– Sağçı partiyalar hökumətin qeyri-qanuni immiqrasiya siyasətinə qarşı tənqidlərini artırdılar İspaniyada nizamsız miqrasiya problemi daxili siyasətdə mühüm yer tutmağa başlayıb.
Hazırda İspaniyada birinci partiya olan sağçı Xalq Partiyası və üçüncü ən böyük partiya olan ifrat sağçı Vox solçu azlıq hökumətinin Kanar adalarından İspaniyanın digər bölgələrinə qeyri-qanuni mühacirləri daşımaq hərəkətinə qəti şəkildə qarşı çıxdı.
Vox Şimali Afrika sahillərindən Kanar adalarına qeyri-qanuni miqrasiya marşrutlarının müəyyən edilməsini və qarşısının alınmasını, açıq sərhəd siyasətinə son qoyulmasını və qeyri-qanuni mühacirlərin deportasiya edilməsini tələb edib.
