Məzarçı Suriyada işgəncə ilə öldürülənlərin gizli dəfn edilməsindən danışıb.
İnterpress.az xəbər verir ki, Dəməşq bələdiyyəsinin keçmiş əməkdaşı Mohammed Afif Nafieh ilk dəfə müsahibə verib. O, özünü Bəşər Əsəd rejiminin qurbanlarının kütləvi məzarlarının iştirakçısı kimi təqdim edib.
Onun ifadəsi Suriyada işgəncə ilə bağlı ilk beynəlxalq məhkəmə prosesinin əsasını təşkil edib.
2011-ci ildən 2018-ci ilə qədər Nafieh Suriya məxfi xidmətlərinin göstərişi ilə qeydlər aparıb və minlərlə cəsədin soyuducu yük maşınlarında iki məxfi qəbiristanlığa – əvvəlcə Nəcədə, sonra Qutaifədə dəfn edilməsini təşkil edib.
“Bir yük maşını 400-ə qədər cəsəd tuta bilərdi. Demək olar ki, hamısında dəhşətli işgəncə əlamətləri var idi.
Onlara baxanda edamdan əvvəl nə qədər ağrı çəkdiklərini təsəvvür etdim. Onlar son ölümlərindən əvvəl yüzlərlə dəfə ölmüşdülər”.”, – o xatırlayır.
Nafieh işdən imtina edə bilməyəcəyini söyləyib: “Totalitar sistemdə “yox” sözü qadağandır, hətta yorğun və ya xəstə olduğunu söyləmək də qadağandır”.
Onun hesabatlarında qeyd etdiyi hər şey, bölmənin adından tutmuş cəsədlərin sayına qədər, başqa şeylərlə yanaşı, Suriya prezidentinin administrasiyasına göndərilib.
“Bəşər Əsəd bu xidmətlərdə baş verən hər şeyi bilirdi”, – Nafieh bildirib.
Nafieh deyir ki, o, gecə yarısı edamların, gecə saat üçdə dəfn olunduğu Sednaya həbsxanasından müntəzəm olaraq cəsədlərin çatdırılmasının şahidi olub.
“Əvvəlcə gördüklərimin öhdəsindən gəlməyə çalışdım. Ağladım, yata bilmədim, gecələr qışqırdım – elə bil ki, dəfn olunanlar mənə baxırlar”, – o qeyd edib.
2018-ci ildə zabitə rüşvət verdikdən sonra ailəsi ilə birlikdə Almaniyaya gedə bilib.
Almaniyada o, iki suriyalı zabitin mühakimə olunduğu Koblenz məhkəməsində ifadə verib. Daha sonra ABŞ Konqresində və BMT forumlarında çıxış edib.
Dekabrda Əsəd rejiminin süqutundan sonra o, bu gün ilk dəfə açıq danışır: “Rejim süqut etməmişdən əvvəl üzümü göstərmirdim. Mən susanda da qohumlarımı həbs etdilər. İndi danışmaq vaxtıdır. Söz verdim ki, Suriya zülmü cavabsız qalmayacaq”.
Nafieh hesab edir ki, beynəlxalq sanksiyaları ləğv etməyin vaxtı çatıb.
“Suriya rejim deyil. Suriya xalqdır. İndi bu xalq günahkar olmadığı cinayətlərə görə artıq əziyyət çəkməməlidir”, – o vurğulayıb.
Xuraman Etibarlı
İnterpress.az
