Belarusun tələbi ilə Ermənistanda saxlanılan Diana Moiseyenko azadlığa buraxılıb. O, artıq sığınacaq üçün ərizə verib.
interpress.az xəbər verir ki, bu barədə o, “Azadlıq” radiosunun Belarus xidmətinə məlumat verib.
Bildirilir ki, Belarusun tələbi ilə Ermənistanda saxlanılan Diana Moiseyenko azad edilib, lakin o, hələlik ölkəni tərk edə bilmir.
Moiseyenko sentyabrın 2-də Gürcüstan-Ermənistan sərhədində saxlanılıb, bundan sonra Noyemberyan şəhərinin polis bölməsinə aparılıb.
“Məni bir idarəyə, sonra digər ofisə apardılar, dedilər ki, məlumatı açıqlamağa ixtiyarları yoxdur. Əməliyyatçı gəlib dedi ki, axtarışdayam. Məni yerli polisə apardılar. Orada protokol imzaladılar və məhkəməyə qədər məni 72 saat saxlayacaqlarını bildirdilər. Təbii ki, mən şokda idim”, – Moiseyenko deyib.
Onun sözlərinə görə, o, elə həmin gün buraxılıb, sentyabrın 3-də isə İrəvana vəkilin qəbuluna gedəcək.
“Nəzəri olaraq, onlar məni ekstradisiya edə bilməzlər, lakin təhlükəsizlik qüvvələrinin Belarusdan gəlib məni apara biləcəyindən qorxuram. Bunun nə dərəcədə real olduğunu bilmirəm. Ona görə də mən artıq Ermənistandan siyasi sığınacaq almaq üçün ərizə vermişəm”, – Moiseyenko bildirib.
Faktla bağlı Cinayət Məcəlləsinin 342-ci (“İctimai qaydanı kobud surətdə pozan hərəkətləri təşkil etmə və hazırlama və ya onlarda fəal iştirak etmə”) maddəsi ilə cinayət işi açılıb. İşdə 150 səhifə var, təfərrüatları ona məlum deyil.
Moiseyenko keçmiş siyasi məhbus Andrey İvanyuşinin qızıdır. O, 2023-cü ildə Belarusu tərk edib.
2024-cü ilin fevralında belaruslu Yaroslav Novikov Ermənistan-Gürcüstan sərhədində saxlanılıb. Belarusda ona qarşı hərbi xidmətdən yayındığına görə (Belarus Respublikası Cinayət Məcəlləsinin 435-ci maddəsinin 1-ci hissəsi) cinayət işi açılıb. Ötən ilin sentyabrında Belarus hakimiyyəti onu dövlətlərarası axtarışa verib.
Xuraman Etibarlı
İnterpress.az
