Freedom House-un hesabatına görə, Gürcüstanda demokratiya səviyyəsi 33,93%-ə qədər azalıb. Hesabata görə, ölkədə demokratiya balı 3,07-dən 3,04-ə düşüb.
İnterpress.az xəbər verir ki, təşkilat Gürcüstanı “keçid və ya hibrid rejim” adlandırır.
Freedom House-un hesabatında qeyd edildiyinə görə, müstəqil medianın reytinqi “jurnalistlərə qarşı zorakılıq və təqiblərin çoxillik pisləşməsi tendensiyası səbəbindən” 3,50-dən 3,25-ə düşüb. “Freedom House” buna misal olaraq hökuməti tənqid edən iki televiziya direktorunun mühakimə olunmasını, həmçinin “redaksiya müstəqilliyinə xələl gətirən getdikcə qütbləşən və siyasiləşən media mühitini” göstərib.
Təşkilatın dərc etdiyi hesabatda qeyd olunub ki, Gürcüstanda demokratiya 2022-ci ildə ölkənin Aİ-yə namizəd statusu istiqamətində addımlar atdığı zaman diqqətlə izlənilib, lakin “məhkəmə müstəqilliyi, media azadlığı və çoxpartiyalı idarəetmə kimi sahələrdə struktur problemlərin böyük ölçüdə həll olunmamış qalması Gürcüstanın demokratik inkişafına və Aİ-yə inteqrasiyasına mane olur”.
Bundan əlavə, “Freedom House” qeyd edir ki, “Avropa Şurasının ölkədə insan haqlarının vəziyyəti ilə bağlı qiymətləndirməsi müxtəlif kritik sahələri, o cümlədən LGBT+ icmasına və dini azlıqlara qarşı həm uzaqdan, həm də üz-üzə geniş diskriminasiyanı müəyyən edib”.
Freedom House qeyd edib ki, “Gürcü Arzusu” müxalifəti “müharibə partiyası” adlandırır ki, bu da ölkədəki qütbləşmənin daha bir sübutudur.
Təşkilat hesabatda Gürcüstanın keçmiş prezidenti Mixeil Saakaşvilinin hüquqi təqibindən də danışır, onların fikrincə, bu iddia siyasi antaqonizm, şəxsi həyatın toxunulmazlığı hüquqlarının pozulması, habelə məhkəmə sistemi tərəfindən azad və ədalətli mühakimənin mümkünlüyü ilə bağlı narahatlıq doğurur.
