Güclü qar və yolların buz bağlaması səbəbindən Rusiya-Gürcüstan sərhədi yaxınlığında təxminən 2 min yük maşını dayanıb.
Bu barədə İnterpress.az xarici mediaya istinadən xəbər verir.
Məlumata əsasən, 2000-dən çox yük maşını Rusiya Federasiyasından Gürcüstan istiqamətinə çıxmaq üçün qeydiyyata alınıb.
Noyabrın 22-də Gürcüstanın Avtomobil Yolları Departamenti Mtsxeta-Stepantsminda-Lars avtomobil yolunun Qudauri-Kobi hissəsində yüngül avtomobillərin hərəkətinin bərpa olunduğunu bildirib.
Bu gün, noyabrın 23-də Avtomobil Yolları Departamenti bildirib ki, aparılan təmizləmə işləri nəticəsində beynəlxalq əhəmiyyətli Mtsxeta-Stepantsminda-Lars avtomobil yolunun Qudauri-Kobi hissəsində qoşqu və yarımqoşqulu avtomobillərin hərəkəti də bərpa edilib.
Qeyd edək ki, Yuxarı Larsdan keçən yol Rusiyanı Gürcüstan və Ermənistanla birləşdirən yeganə quru yoludur.
