“O vaxtlar meydanlarda belə şuarlar səsləndirilirdi ki, ermənilər, ruslar, yəhudilər, ümumiyyətlə başqa xalqların nümayəndələri Azərbaycandan çıxarılmalıdır. Mən bu fikrin əleyhinə olmuşam”.
İnterpress.az xəbər verir ki, bunu Moderator.az-a açıqlamasında “Tövbə” cəmiyyətinin sədri Hacı Əbdül son vaxtlarda ermənilərin Bakıya gətirilməsinə münasibət bildirərkən deyib.
Hacı Əbdül fikirlərini belə davam etdirib: “Hələ o vaxt bildirmişəm ki, onları Azərbaycandan çıxarmaq lazım deyil. Ona görə ki, onlar Azərbaycanın sakit, gözəl, şən günlərində Azərbaycan vətəndaşı idilər, gözəl yaşayırdılar. Azərbaycanın ağır günləri başlayanda isə onları ölkədən çıxarmaq lazım deyildi. Mən o zaman təklif etmişdim ki, onları Azərbaycan vətəndaşı kimi silahlandırmaq və Qarabağın müdafiəsinə göndərmək lazım idi. O vaxt ölkəmizin ağır günlərində onları ölkədən çıxartdılar, xoş günündə isə yenidən Azərbaycana dəvət edirlər. Xeyir ola, pis günümüzdə çıxıb gedirdilər, indi yaxşı gündə niyə qayıdırlar? Görürsünüzmü, mənim sözüm indi gəlib yerinə düşdü…”
Hacı Əbdül daha sonra “Hazırda ermənilərin Bakıya gətirilməsini doğru hesab edirsinizmi?” sualımızı da cavablandırıb: “Ermənilərin Azərbaycana qayıtması yeni deyil, tarix boyu bu belə olub. Azərbaycan, Ermənistan və yaxud da Rusiya qonşu dövlətlərdir və bu ölkələrin arasında Tramp kimi hasar çəkmək mümkün olmayacaq. Biz çalışmalıyıq ki, mehriban şəraitdə yaşayaq”.
İnterpress.az
