Azərbaycan Macarıstanın paytaxtı Budapeşt şəhərində keçirilən Avropadaxili Vergi Administrasiyaları Təşkilatı (IOTA) tərəfindən təşkil edilən “İnsan resurslarının idarə edilməsi forumu”nda təmsil olunub.
Bu barədə İnterpress.az İqtisadiyyat Nazirliyi yanında Dövlət Vergi Xidmətinə (DVX) istinadən xəbər verir.
Məlumata görə, tədbirdə 30-a yaxın ölkədən 50-dən çox nümayəndə iştirak edib, 40 nəfərə yaxın iştirakçı isə tədbirə onlayn formada qoşulub.
Məlumata görə, DVX-nin İnsan resursları baş idarəsinin rəis müavini Ceyhun Mehdiyev, həmin və idarənin əməkdaşı Məlakə Nəsirova, DVX-nin Tədris Mərkəzinin Vergi inzibatçılığının tədrisi şöbəsinin əməkdaşı Şahin Hüseynli tədbirdə iştirak ediblər.
IOTA-nın icraçı katibi Alix Perrignon de Troyes tədbirin mahiyyəti və gözləntilər barədə məlumat verib. Bildirib ki, forum müxtəlif ölkələrin vergi sistemlərinin insan resursları sahəsində təcrübə mübadiləsinin təşkili istiqamətində faydalı platformadır.
Forumda İqtisadiyyat Nazirliyi yanında Dövlət Vergi Xidmətinin İnsan resursları baş idarəsinin rəis müavini Ceyhun Mehdiyev “Azərbaycanın vergi orqanlarında potensialın gücləndirilməsi prosesləri” mövzusunda təqdimatla çıxış edib.
Təqdimat zamanı DVX-də insan resurslarının səmərəli idarə edilməsi və inkişafı üçün tətbiq olunan strategiyalar və təşəbbüslər haqqında ətraflı izahat verilib. Bundan başqa, DVX-nin insan kapitalının inkişafı istiqamətində həyata keçirdiyi və perspektiv layihələrin mahiyyəti izah edilib. Təqdimat çərçivəsində DVX-nin məqsədyönümlü kadr siyasəti nəticəsində əldə edilmiş nailiyyətlər diqqətə çatdırılıb. Təqdimatdan sonra DVX-nin bu sahədə fəaliyyəti barədə ünvanlanmış suallar cavablandırılıb.
Forum çərçivəsində vergi orqanlarının əməkdaşlarının bilik və bacarıqlarının artırılması, səriştələrinin təkmilləşdirilməsi kimi mövzusunda qrup müzakirələri təşkil olunub. DVX-nin nümayəndələri müzakirələr zamanı təmsil etdikləri qurumun təcrübəsini bölüşüb və təkliflər səsləndiriblər.
Forumda Avstriya, Yunanıstan, Belçika, Macarıstan, İsveçrə, Finlandiya, İrlandiya, Fransa, Rumıniya, İtaliya, Danimarka, Estoniyada olan çıxışçıların, İƏİT təmsilçilərinin təqdimatları dinlənilib.
