Yaponiyada doğum nisbəti kəskin şəkildə aşağı düşür və proqnozlar qorxulu görünür.
İnterpress.az xəbər verir ki, Tohoku Universitetinin professoru Hiroşi Yoşidanın hesablamalarına görə, 2720-ci ilə qədər ölkədə 14 yaşına çatmamış yalnız bir uşaq qala bilər.
Hazırda 15 yaşa qədər uşaqlar Yaponiya əhalisinin yalnız 11%-ni təşkil edir. Müqayisə üçün qeyd edək ki, ölkə sakinlərinin demək olar ki, 30%-i 65 yaşdan yuxarı insanlardır. Bu rəqəmlər demoqrafik böhranın ciddiliyini göstərir.
Yaponiya kəskin şəkildə bir-biri ilə əlaqəli iki problemlə üzləşib: əhalinin qocalması və doğum səviyyəsinin azalması.
Mütəxəssislər bunu nikahların sayının azalması ilə əlaqələndirirlər. 2020-ci il siyahıyaalınmasına əsasən, 50 yaşına qədər kişilərin təxminən 28%-i heç vaxt evlənməyib, qadınlarda isə bu rəqəm 17,8%-dir.
Bu cür tendensiyalar ölkənin gələcəyini təhdid edərək, həll yollarının axtarışını Yaponiya cəmiyyəti üçün ən mühüm problemlərdən birinə çevirir.
Xuraman Etibarlı
İnterpress.az
