ATƏT PA prezidenti Azərbaycanın üzləşdiyi mina problemi ilə bağlı məlumatlandırılıb.
İnterpress.az-ın məlumatına görə, ANAMA İdarə Heyəti sədrinin birinci müavini Bəhruz Məmmədov ATƏT Parlament Assambleyasının prezidenti Pia Kaumanın başçılıq etdiyi nümayəndə heyəti ilə görüş keçirib. B.Məmmədov görüş zamanı Agentliyin fəaliyyət istiqamətləri, ölkəmizin üzləşdiyi mina problemi, minaların insanların həyatına törətdiyi təhdidlər, keçmiş məcburi köçkünlərin öz doğma yurdlarına qayıtması və işğaldan azad olunmuş ərazilərdə bərpa-quruculuq işlərinin gedişatına yaratdığı maneələr, eləcə də bu təhdid və maneələrin aradan qaldırılması istiqamətində həyata keçirilən genişmiqyaslı humanitar minatəmizləmə əməliyyatları barədə nümayəndə heyətinə məlumat verib.
Ölkədə humanitar minatəmizləmə sahəsində həyata keçirilən işlərlə ətraflı maraqlanan və bu fəaliyyətin xüsusi önəm kəsb etdiyini diqqətə çatdıran P.Kauman suallarının cavablandırılmasına, habelə aşkarlanan hər bir mina və xilas edilən hər bir insan həyatına görə təşəkkürünü ifadə edib və Agentliyə fəaliyyətində uğurlar arzulayıb.
