ATƏT-in Minsk qrupu həmsədrlərinin bəyanatında deyilir ki, bu cür silahların istifadəsi münaqişənin qəbuledilməz eskalasiyasını göstərir: \”Biz həlak olanların ailələrinə dərin hüznlə başsağlığı verir və hər iki tərəfdən beynəlxalq səviyyədə tanınan sərhədlərdə və təmas xəttində itkilərin baş verməsindən dərin narahatlıq keçiririk.
Biz tərəfləri bütün mümkün vasitələr daxilində mülki itkilərdən yayınmağa çağırırıq.
Tərəflərin Cenevrə Konvensiyasına əsasən, mülki şəxslərin sağlamlıq və təhlükəsizliyini qorumaqla bağlı öhdəlikləri var. Bu insidentlərin Ermənistan və Azərbaycan xarici işlər nazirlərinin Nyu Yorkda razılaşdırılmış görüşü ərəfəsində baş verdiyinə görə təəssüf edirik.
Nazirlərin zorakılığın artması və danışıqlar prosesi ilə bağlı məsələlərdə ciddi müzakirələr aparacağını gözləyirik. Tərəflər bir-birini ittiham etdiyi üçün biz zorakılığın necə baş qaldırdığını müəyyən etməkdə çətinlik çəkirik. Tərəflər prezidentlər arasında müzakirə edildiyi kimi, ATƏT tədqiqat mexanizmi üzərində çalışmalıdır”, – deyə bəyanatda qeyd olunur.
Bəyanatın sonunda ATƏT-in Minsk qrupunun gərginliyin azaldılması və davamlı sülh sazişinə nail olunması istiqamətində səyləri davam etdirəcəyi bildirilir.
İnterpress.az
