Məşhur rus-amerikalı balet artisti Mixail Barışnikov Kanadanın “The Globe And Mail” nəşrinə müsahibəsində Rusiyanın Ukraynada keçirdiyi hərbi əməliyyata münasibət bildirib.
İnterpress.az xəbər verir ki, sənətçi hadisələri “vicdansızlıq” adlandırıb.
“Rus və Ukrayna xalqları arasında münasibətlər, dillər, mədəniyyətlər və sərhədlər arasında fərq çox az xarakterizə olunur. İki ölkə inanılmaz dərəcədə bir-birinə bağlıdır, yalnız incə mədəni fərqlər var. Buna görə də indi orada baş verənlər sadəcə olaraq vicdansızlıqdır. Vladimir Putin Krımı ilhaq edəndə hamı kimi mən də sarsıldım. Amma Ukraynanın işğal olunacağını gözləmirdim. Onun postsovet imperiyasına nəzarətə bu qədər həssas olduğunu və keçmiş Sovet respublikalarını geri almağa çalışacağını düşünmürdüm. Səhv imişəm.
Putinin ona qarşı çıxan hər kəsi qınaması məni təəccübləndirmir. Bu, küncə sıxılmış təcavüzkarın klassik cavabıdır. Azad və demokratik cəmiyyət istəyən ruslar cəhd etməyə davam etməlidirlər. Bəlkə də onları bu işdə bir araya gətirdiyi üçün cənab Putinə təşəkkür etməlidirlər” deyə, Barışnikov vurğulayıb.
Sənətçi həmçinin qeyd edib ki, onun SSRİ-dən (Sovet Sosialist Respublikaları İttifaqı) getməsi siyasi baxışlarla bağlı deyil:
“Rusiyanı tərk etmək qərarım qəfil oldu və bədii maraqdan ilhamlandı. İlk ingiliscə ifadəm belə oldu: “Mən qaçan deyiləm, axtaranam”. Yəni qərarım siyasi deyil, şəxsi idi. Amma zaman keçdikcə anladım ki, bu demokratik bir vəzifədir”.
Qeyd edək ki, RSFSR-in Əməkdar artisti olan M.Barışnikov 1974-cü ildə qastrol səfəri zamanı Kanadadan geri qayıtmayıb. Belə ki, o, SSRİ defektorudur (red. – xarici səfərlərdən ölkəyə qayıtmaqdan imtina edən SSRİ vətəndaşı). (axsam.az)
