“Rusiya sülhməramlılarının geri çəkilməsi regiona xeyir verəcək”.
İnterpress.az xəbər verir ki, tanınmış erməni bloger və jurnalist Roman Baqdasaryan TRT-nin rus dili xidmətinə bu hadisənin nəticələri və ermənilərin buna münasibəti barədə danışıb.
O bildirib ki, Rusiya sülhməramlıları missiyanın bitməsinə il yarım qalmış Qarabağı tərk edirlər. Bu qərar Moskva və Bakıda verilib.
Baqdasaryan bu qərarın necə gözlənildiyini və bunun hansı nəticələrə səbəb olacağından da danışıb.
“Bu, tamamilə təbii prosesdir. Ötən ilin sentyabrında ermənilər Qarabağı tərk edəndən sonra Rusiya sülhməramlılarının bölgədə işi yox idi. Hesab edirəm ki, başqa variant yox idi və bunu həm Moskvada, həm də Bakıda mükəmməl başa düşürdülər.
Rusiyanın Ermənistanda təsiri xeyli azalıb və hər gün azalmaqda davam edir. Son üç ildə Moskva üçtərəfli sazişin iştirakçısı kimi yalnız fəaliyyətsizlik və məsuliyyətsizlik nümayiş etdirib.
Ona görə də təsir azalacaq və mən çox ümid edirəm ki, Gürcüstan və Azərbaycan da bunda maraqlı olacaq. Bu, bütün regionun xeyrinə olacaq”, – bloger deyib.
O, rus əsgərini işğalçı adlandırıb.
“Qarabağ erməniləri üçün rus əsgəri həmişə işğalçı. Onlar yaxşı xatırlayırlar ki, 1991-ci ildə bir rus əsgəri “Halqa” əməliyyatında necə iştirak edib.
Onlar bilirlər ki, 44 günlük müharibədə erməni paltarı geyinmiş rus əsgərləri necə vahimə yaradırdılar. 44 günlük müharibədən sonra hər üç il ərzində bölgədə atışmalar davam etdi, lakin sülhməramlılar heç nə etmədilər və yalnız erməni mövqelərini təslim etdilər.
Laçın dəhlizinin Azərbaycan ordusu tərəfindən tutulması zamanı rus əsgərləri Qarabağ ermənilərindən rüşvət alıb, sonra qovub, özləri isə Qarabağın özündə içib-yeməyə davam ediblər.
Yəqin ki, rus əsgəri orada yaşayan ermənilər gedərkən öz utancını hiss etməyib, özü də bu ərazilərdə qalıb. Deyə bilərəm ki, Qarabağ erməniləri onların gəldiyi nəticəyə biganədirlər. Əgər onları himayəçi kimi görsəydilər, keçən ilin sentyabrında evlərini tərk etməyə qərar verməzdilər”, – jurnalist qeyd edib.
“Bu hadisəyə bütövlükdə erməni cəmiyyətinin necə reaksiya verdi?” sualına Baqdasaryan deyib:
“İnsanlar sülhməramlıların bu qədər tez getməsindən şoka düşüblər. Amma onların üzüldüyünü deyə bilmərəm.
Ermənilərin əksəriyyəti regionumuzda daha az rus hərbçisinin olmasını arzulayır. 35 ildir ki, sülhməramlılar və Rusiya hakimiyyəti yalnız sabitliyi pozub.
Qoy sadə insanlar sülh içində yaşasınlar: ruslar, azərbaycanlılar, ermənilər, gürcülər. Amma Rusiya və Rusiya prezidenti regiondakı vəziyyətə təsir etmək cəhdlərini dayandırmalıdır”.
Xuraman Etibarlı
İnterpress.az
