“Bütün əlamətlər göstərir ki, Gürcüstanda koronavirus pandemik yayılmadan endemik yayılmaya keçir”.
Bunu ölkənin səhiyyə nazirinin müavini Tamar Qabuniya brifinqdə deyib.
O bildirib ki, Gürcüstanda epidemioloji vəziyyətin sürətli templərlə yaxşılaşdığını təsdiqləyən bütün göstəricilər var:
“Bu, o demək deyil ki, vəziyyət diqqətdə saxlanılmamalıdır. Qoruyucu maskadan imtina etmək hələ olmaz. Hesab edirik ki, infeksiyanın yayılması pandemik deyil, daha lokal olacaq”.
Qeyd edək ki, Gürcüstanda COVID-19-a ilk yoluxma faktı 2020-ci ilin fevralın 26-da qeydə alınıb. Hazırkı dövrədək virusa 1 639 678 nəfər yoluxub ki, onların da 1 564 011-i müalicə olunaraq sağalıb, 16 612-si isə vəfat edib.
