Tayvan hökumətinin rəsmiləri maaşlarının bir hissəsini Türkiyəyə bağışlayacaq.
Bu barədə İnterpress.az yerli mediaya istinadən xəbər verir.
Bildirilib ki, Tayvan lideri Tsai İnq-ven və yüksək rütbəli hökumət rəsmiləri Kahramanmaraşda 10 əyalətdə zəlzələdən sonra fəsadların aradan qaldırılması işlərinə dəstək üçün maaşlarının bir hissəsini verəcəklər.
Tsaydan başqa, vitse-prezident Lai Çinq-te, baş nazir Çen Çien-jen və baş nazirin müavini Çenq Ven-tsan da əməkhaqqını bağışlamağa söz veriblər.
Tayvan hökuməti 2 milyon dollar, Tayvan xalqı isə hökumətin ianə hesablarına indiyədək 340.000 dollardan çox pul köçürüb.
Bundan əlavə, Tayvan Türkiyəyə 130 nəfərdən ibarət iki axtarış-xilasetmə qrupu göndərib.
“Türkiyənin 20 il əvvəl bizə etdiyi yaxşılığı geri qaytarırıq”, Tayvan lideri Tsai bildirib.
Xilasetmə dəstəsində olan zabitlər Türkiyəyə 1999-cu ildə göstərdiyi köməyə görə təşəkkür edərək, bütün resursları və imkanları ilə kömək etməyə hazır olduqlarını vurğulayıblar.