Neçə vaxtdır ağır xəstəlikdən əziyyət çəkən Gülşən Kazımova-Atəş yanvarın 11-də Haaqa şəhərində müalicə aldığı xəstəxanada dünyasını dəyişib. Yanvarın 12-də mərhumla vida mərasimi təşkil olunacaq, daha sonra onun nəşi Azərbaycana gətirilərək Bakıda dəfn ediləcək.
İnterpress.az xəbər verir ki, 1961-ci il noyabrın 8-də Bakı şəhərində anadan olan Gülşən Kazımova-Atəş Azərbaycan Yazıcılar Birliyinin və Niderland Yazıcılar İttifaqının üzvü idi. Hollandiyada tərcüməçilik fəaliyyəti ilə də məşğul olan yazıçı ölkə ictimaiyyəti və mətbuatında tanınırdı. Gülşən Kazımova-Atəş 2006-cı ildə Niderlandda nəşr edilmiş \”Nəslimizin qızları\” adlı kitabına görə 2009-cu ildə Rusiyada keçirilən ədəbiyyat müsabiqəsində ilk yeri qazanmışdı.
Niderlandda fəal diaspor nümayəndəsi kimi tanınan Gülşən xanım Avropadakı azərbaycanlı qadınların cəmiyyətə inteqrasiyasına dəstək vermək, onların hüquq və azadlıqlarının qorunmasına yardım göstərmək məqsədilə 2004-cü ildə “Ana Vətən” Avropa Azərbaycanlı Qadınlar Birliyini yaratmışdı. O, eyni zamanda Azərbaycan həqiqətlərinin dünyaya çatdırılmasında böyük xidmətlər göstərib.
Azərbaycan Respublikası Prezidentinin Sərəncamı ilə 2011-ci il iyulun 4-də mədəniyyət sahəsindəki nailiyyətlərinə, Azərbaycan diasporunun inkişafındakı xidmətlərinə gorə Azərbaycan Respublikasının “Əməkdar mədəniyyət işcisi” fəxri adına layiq görülüb. 2014-cü ildə isə Haaqada yazıçının yaradıcılıq gecəsi keçirilib.
“Təmiz dünya” İB-nin sədri Mühriban Zeynalova İnterpress.az-a bildirib ki, ictimai fəal kimi də tanınan mərhumun “Azər və Aida adası” əsəri böyük rəğbətlə qarşılanıb. Gülşən Kazımovanın növbəti romanının yarımçıq qaldığı bildirilir.
Allah rəhmət etsin!
İnterpress.az
