Bu barədə APA-ya Ədliyyə Nazirliyi Tibb Baş İdarəsinin rəis müavini İftixar Qurbanov məlumat verib.
İ. Qurbanov bildirib ki, T. Xasməmmədov ümumi müayinələrdən keçir, onun səhhəti normaldır.
Ədliyyə Nazirliyi Penitensiar Xidmətinin ictimaiyyətlə əlaqələr şöbəsindən isə T. Xasməmmədovla bağlı mətbuatda yayılan məlumatların heç bir əsasının olmadığı bildirilib.
Qeyd edək ki, bəzi mətbuat orqanlarında həbsdə olan hüquq müdafiəçisi T. Xasməmmədovun damarlarını kəsməsi, aclığa başlaması barədə məlumatlar yayılıb.
T. Xasməmmədov fevralın 24-də Göyçay rayonunda saxlanılıb. Göyçay rayon Məhkəməsində T. Xasməmmədov barəsində 3 ay müddətinə həbs qətimkan tədbiri seçilib.
Həmin gün Daxili İşlər Nazirliyi (DİN) Taleh Xasməmmədovun saxlanılmasına aydınlıq gətirib.
Nazirliyin mətbuat xidmətinin rəis müavini Ehsan Zahidov APA-nın sorğusuna cavabında qeyd edib ki, Göyçay rayon sakini Taleh Xasməmmədov törətdiyi konkret qanunazidd hərəkətinə görə polis tərəfindən saxlanılıb: “Bu gün saat 13.50 radələrində ərazidə xidmət aparan polis əməkdaşları bir nəfərin başqa birisini yerə yıxaraq döydüyünü görüblər. Polislər dərhal ora yaxınlaşaraq hadisəyə müdaxilə edib. Məlum olub ki, Taleh Xasməmmədov idarə etdiyi nəqliyyat vasitəsini düzgün park etmədiyi üçün Zahir adlı şəxs ona irad bildirib. Bu zəmində onlar arasında mübahisə düşüb və Taleh Xasməmmədov Zahirə müxtəlif bədən xəsarətləri yetirib. Onlar hər ikisi saxlanılıblar. Zərərçəkən Zahirin ərizəsi əsasında Rayon Polis Şöbəsinin istintaq bölməsində araşdırmalara başlanıb və məsələyə hüquqi qiymət veriləcək”.
T. Xasməmmədov 2011-ci ildə də xuliqanlıq və polisə müqavimətdə ittiham olunaraq Göyçay Rayon Məhkəməsinin hökmü ilə 4 il müddətinə azadlıqdan məhrum edilmişdi.
İnterpress.az
