ABŞ Quru Qoşunları ordunun yenidən qurulması çərçivəsində “dəyişən təhlükəsizlik mühiti və müharibənin inkişaf edən xarakterini nəzərə alaraq” 24 min mövqeni ləğv etməyi planlaşdırır.
Bu barədə interpress.az xarici mediaya istinadən xəbər verir.
Quru Qoşunları öz saytında dərc edilən “Ordu Qüvvələri Quruluşunun Transformasiyası” adlı hesabatda yenidən strukturlaşma planını açıqlayıb:
“Dəyişən təhlükəsizlik mühiti və müharibənin inkişaf edən xarakteri fonunda ordu diqqətini texnoloji cəhətdən inkişaf etmiş hərbi qüvvələrə qarşı genişmiqyaslı döyüş əməliyyatları keçirməyə yönəldir. Ordu bu tələblərə cavab vermək üçün yeni imkanlar istehsal etməli və güc strukturunu yenidən balanslaşdırmalıdır”.
Məlumata görə, yenidən strukturlaşmanın 494 min əsgər üçün nəzərdə tutulmuş Quru Qoşunlarının qüvvə strukturu ilə qanunla 445 min olaraq təyin olunan əsgər sayı arasındakı fərqin daralmasına imkan verəcəyi vurğulanır. Ordunun güc strukturunu tarazlaşdırmaq planının bir hissəsi əsgər sayına bağlıdır.
Hesabatda hazırkı 24 min ştat vahidinin ləğv edilməsinin nəzərdə tutulduğu bildirilərkən, sözügedən dəyişikliyin yalnız norma ştat strukturunu əhatə etdiyi və heç bir əsgərin vəzifəsini tərk etməyəcəyi qeyd edilib.
Quru Qoşunlarının hazırkı heyətini doldurmaq üçün kifayət qədər əsgər olmadığına diqqət çəkən xəbərə görə, bir neçə il ərzində əsgər sayında artım olacaq.
