Avropanın 19 ölkəsində saxta smartfon satışı ilə bağlı 160-a yaxın axtarış aparılıb.
İnterpress.az xəbər verir ki, bu barədə WDR, NDR və “Süddeutsche Zeitung” məlumat yayıb.
Avropanın 19 ölkəsində saxta smartfonların kütləvi satışı ilə bağlı təxminən 160 axtarış keçirilib.
İstintaqın məlumatına görə, ehtimal olunan cinayət qrupu 2017-ci ildən etibarən Amazon və digər onlayn platformalar vasitəsilə yeni Samsung smartfonları adı altında təxminən 1 milyon saxta telefon sata bilərdi. Kütləvi axtarışlardan əvvəl yeddi şübhəli saxlanılıb.
İstintaqa görə, telefonlar Asiya və ərəb ölkələrindən alınmış işlənmiş ehtiyat hissələrindən yığılıb.
Detallar Dubay və Honq-Konqdakı emalatxanalarda təmizlənərək yenidən birləşdirilib və cihazlar orijinal məhsullardan fərqləndirilməsini çətinləşdirən şəkildə qablaşdırılıb.
Məlumata görə, şəbəkə 2017-ci ildən satışlardan ən azı 300 milyon avro (təxminən 582 milyon manat) gəlir əldə edib.
Almaniyada isə şübhəlilərin saxta şirkətlər və uydurma transsərhəd tədarüklər vasitəsilə ən azı 24 milyon avro (təxminən 46,6 milyon manat) vergi ödəməkdən yayındığı ehtimal olunur.
Xuraman Etibarlı
İnterpress.az
