Dünya bazarında əsas pay sahibi olan ABŞ Çinə tətbiq etdiyi yeni rüsumlarla bağlı diqqətçəkən bir qərar verib. Bu qərar ticarət münaqişəsi fonunda dünya iqtisadiyyatında bəzi dəyişikliklərə səbəb ola bilər. Belə ki, yekun nəticədə Çində istehsal edilən və ABŞ-yə ixrac olunan məhsulların qiymətlərinin artması gözlənilir.
Mövzu ilə bağlı İnterpress.az-a açıqlama verən iqtisadçı Natiq Cəfərli bildirib ki, ABŞ-nin qoyduğu rüsumlar dünya iqtisadiyyatına təsir göstərəcək:
“Ən azından tarif müharibələri istehlakçıların başında çatlayacaq. Necə deyərlər, çünki məhsulların dəyəri artacaq və inflyasiyanın yüksəlməsinə səbəb olacaq. Ona görə də bu tarif müharibələri ən azından Amerika üçün daha az təsir edəcək. Lakin dünya üçün daha ciddi təsirləri olacaq. Yaxın zamanlarda dünyada inflyasiyanın yüksəlməsinin şahidi ola bilərik”.
Onun sözlərinə görə, ABŞ ilə Azərbaycanın ticarət əlaqələrinin mövcud vəziyyətini də dəyərləndirib:
“Azərbaycanla Amerika arasında ticarət dövriyyəsi o qədər də yüksək deyil. Azərbaycan ABŞ-yə ixrac olunan məhsulların həcmi də çox deyil. Buna görə də bu qərarın Azərbaycana ciddi təsir göstərəcəyini düşünmürəm. Çünki ABŞ bizim ticarət tərəfdaşlarımızın ilk 10-luğuna belə daxil olmur. Həmçinin Amerika Azərbaycana daha çox məhsul satır, nəinki biz Amerikaya. Əgər ABŞ məhsullarının tarifləri artırsa, bu, Azərbaycana əksinə xeyir də gətirə bilər”.
Son olaraq iqtisadçı qeyd edib ki, Amerika ilə əlaqələrimizdə dəyişikliklər olsa da, ümumi olaraq Azərbaycan iqtisadiyyatı bu qərardan çox az təsirlənəcək:
“Əgər Amerikadakı məhsulların qiymətləri artsa, bu, Azərbaycana müsbət təsir edə bilər. Nə qədər qəribə səslənsə də, belə bir vəziyyət Azərbaycana xeyir gətirə bilər”.
Məsimə Məmmədova
