Energetik və qazlı şirin içkilər saç tökülməsinin əsas səbəblərindən biridir.
İnterpress.az xəbər verir ki, bununla bağlı amerikalı alimlər araşdırma aparıb.
ABŞ-də aparılan tədqiqatlar göstərib ki, energetik içkilər və qazlı şirin içkilərdə gizlənən yüksək miqdarda şəkər və kofein orqanizmin hormonal balansını pozaraq saç tökülməsini sürətləndirir.
Mütəxəssislərin sözlərinə görə, bir qutu qazlı içkidə 10 qaşığa qədər şəkər ola bilər. Bu, insulin səviyyəsində kəskin dalğalanmalara səbəb olur, endokrin sistemin işini pozur və bədənin iltihab proseslərini gücləndirir. Nəticədə hüceyrələrin, o cümlədən saç follikullarının qocalması sürətlənir və saçların seyrəlməsi başlayır.
Həddindən artıq kofein isə kortizol hormonunun – stres hormonunun yüksəlməsinə gətirib çıxarır. Bu, orqanizmin tez yorulmasına, yuxu rejiminin pozulmasına, sinir sisteminin zəifləməsinə və nəticədə ürək-damar sağlamlığına, həm də saçlara ciddi zərbə vurur.
Alimlər xəbərdarlıq edir: energetik və qazlı içkilərin daimi qəbulu yalnız saçların yox, ümumi sağlamlığın da sürətlə pisləşməsinə yol aça bilər.
Xuraman Etibarlı
İnterpress.az
