Adam Kadırov sosial şəbəkələrdə onunla mübahisə edən istifadəçiləri tapıb cəzalandırmaqla hədələyib.
İnterpress.аz xəbər verir ki, bu barədə Rusiya KİV məlumat yayıb.
Çeçenistan rəhbərinin oğlu Adam Kadırov “Instagram” sosial şəbəkəsində onunla mübahisə edən və fikirlərinə qarşı çıxan istifadəçilərə qarşı kəskin hədə-qorxu dolu bəyanat yayıb.
O, şərhlərdə onunla razılaşmayan müxalif fərdlərin ünvanına sərt ifadələr işlədib.
Kadırov narazı şəxslərə öz dəqiq koordinatlarını və ev ünvanlarını rəy bölməsində sərbəst şəkildə qeyd etməyi təklif edib.
O, əvvəllər də bu cür addım atanları xatırladaraq, “Hər kəs tapılıb və hər kəs öz layiqli cəzasını alıb” deyə vurğulayıb.
Kiçik Kadırov onunla şəxsən görüşməyə və üz-üzə gəlməyə cəsarəti çatmayan istifadəçilərə isə gələcəkdə “dillərini dinc saxlamağı” və birdəfəlik susmağı tövsiyə edib.
Onun bu hədə-qorxu dolu paylaşımı Rusiya mətbuatında və sosial şəbəkələrdə növbəti dəfə böyük rezonans və müzakirələr doğurub.
Xuraman Etibarlı
İnterpress.аz
