İspaniyanın müdafiə naziri Marqarita Robles İspaniya Milli Kəşfiyyat Mərkəzinin (CNI) iki əməkdaşının gizli sənədləri qaçaqmalçılıq yolu ilə ABŞ-a aparması ilə bağlı iddiaları təsdiqləyib. Bu barədə İnterpress.az xarici mediaya istinadən xəbər verir. Latviyadakı NATO bazasını ziyarət edən Robles açıqlamasında İspaniya mətbuatında CNI-nin iki əməkdaşına qarşı hüquqi araşdırma açıldığına dair iddiaların doğru olduğunu bildirib.
Robles, hansı məlumatların qaçırıldığı ilə bağlı heç bir açıqlama verməyib, iki kəşfiyyatçıya qarşı ittihamların CNI tərəfindən edildiyini və hadisənin məhkəmə orqanlarında olduğunu bildirib.
Ədliyyə naziri Feliks Bolanos da Madriddəki məhkəmədə aparılan istintaqda “İspan hökumətinin bütün iddiaların aydınlaşdırılması üçün tam əməkdaşlıq edəcəyini” bildirib.
İspaniya mətbuatı ABŞ-a məxfi sənədləri və məlumatları qaçaqmalçılıq yolu ilə keçirməkdə ittiham olunan iki CNI əməkdaşından birinin müvəqqəti həbs qərarı ilə həbsxanaya göndərildiyini, digərinin isə şərti olaraq azadlığa buraxıldığını bildirib.
“El Confidencial” qəzeti hadisənin ABŞ-da böhrana səbəb olduğunu və qaçaqmalçı məlumatların “tam məxfi” olduğunu iddia edib.
