YAP Ucar rayon təşkilatının yaranmasının 29-cu ildönümü qeyd olunubbackend

YAP Ucar rayon təşkilatının yaranmasının 29-cu ildönümü qeyd olunub

  • whatsapp
  • messenger
  • telegram
  • vkontakte
  • odnoklassniki

30 il əvvəl-1992-ci iI noyabrın 21-də müstəqil Azərbaycanın həyatında olduqca əlamətdar, tarixi bir hadisə baş verdi. Ulu Öndər Heydər Əliyevin rəhbərliyi və sədrliyi ilə Naxçıvanda Yeni Azərbaycan Partiyasının təsis konfransı keçirildi. Bu, doğrudan da ölkənin həyatında misilsiz bir hadisə idi.

Bu, ilk növbədə Ümummilli Liderimiz Heydər Əliyevin təşəbbüsü idi və həm tarixə, həm də müasirliyə əsaslanan bu ideologiya bütün cəmiyyəti birləşdirirdi. Bu ideologiya həm tarixi keçmişimizi özündə ehtiva edirdi, həm də müasir siyasəti əhatə edirdi. Yarandığı gündən bu günədək partiya böyük, şərəfli və uğurlu bir yol keçdi. YAP, demək olar ki, cəmiyyətin bütün təbəqələrini, bütün yaş qruplarını birləşdirir, o, sözün əsl mənasında, ümumxalq partiyasıdır.

YAP-ın bir qolu olan Ucar rayon təşkilatı da böyük qürur hissi ilə yaranmasının 29-cu ilini qeyd edib. Bu münasibətlə 10 sentyabr 2022-ci il tarixdə keçirilən tədbirin iştirakçıları əvvəlcə Ümummilli Lider Heydər Əliyevin Ucar rayonunun mərkəzində ucaldılmış abidəsi önünə tər çiçək dəstələri qoyub, Ulu Öndərin xatirəsini anıblar. Sonra tədbir Yeni Azərbaycan Partiyası Ucar rayon təşkilatının qərərgahında davam edib.

Azərbaycan Respublikasının Dövlət Himni səsləndirildikdən sonra Azərbaycanın ərazi bütövlüyü uğrunda şəhid olmuş Vətən oğullarının əziz xatirəsi bir dəqiqəlik sükutla yad edilib.
Tədbiri YAP Ucar rayon təşkilatının sədri Şəhla Abdullayeva açaraq qeyd edib ki, Yeni Azərbaycan Partiyasının fəaliyyəti müstəqil Azərbaycanın siyasi tarixinin ən parlaq səhifələrindən biridir. Təşkilat sədri vurğulayıb ki, YAP yaradıldıqdan sonra respublikanın bütün bölgələrində onun təşkilatlanması prosesi başladı, xalqın Heydər Əliyevə dərin inam və etimadı nəticəsində partiyanın sıraları genişləndi və 1993-cü il sentyabrın 11-də Ucar rayon təşkilatı yaradıldı.

Daha sonra YAP Ucar rayon təşkilatının sədr müavini Nuru Piriyev rayon təşkilatının keçən illər ərzindəki fəaliyyəti barədə məruzə edərək qeyd edib ki, partiyanın “Yeni, müstəqil Azərbaycan uğrunda” ideyasından çıxış edən YAP Ucar rayon təşkilatı dövlət siyasətinin həyata keçirilməsində yaxından iştirak edir. N.Piriyev bildirib ki, 1993-cü il sentyabr ayında 19 ərazi təşkilatında 160 nəfər üzvü olan rayon təşkilatının sıraları ötən illərdə rayon ziyalıları, xüsusilə də qadınların və gənclərin üzvlüyü ilə böyüyərək hazırda 58 ərazi təşkilatı üzrə 4286 nəfərə çatıb. Yeni Azərbaycan Partiyasının hər bir üzvünün, o cümlədən YAP Ucar rayon təşkilatının ətrafında birləşmiş partiya üzvlərinin Ulu öndərimiz Heydər Əliyevin siyasi məktəbinin yetirməsi və onun ideyalarının davamçıları olduğunu vurğulayan natiq 44 günlük Vətən müharibəsi və Tarixi Zəfərimizin yaratdığı yeni reallıqların ölkənin ictimai-siyasi həyatında aparıcı rol oynayan Yeni Azərbaycan Partiyasının qarşısında yeni vəzifələr qoyduğunu və bu hədəflər uğrunda əllərindən gələni etməyə hazır olduqlarını bildirib.

Rayon Ağsaqqallar Şurasının sədri Mirzalı Ağamalıyev, rayon Təhsil sektoru Ərazi Partiya Təşkilatının sədri Yeganə Süleymanova çıxışlarında bundan sonra da partiyanın qarşıya qoyduğu vəzifələrin icra olunmasında fəal olacaqlarını ifadə ediblər.

Tədbirin sonunda Milli Məclisin deputatı Ramil Həsən geniş və əhatəli çıxış edib. Millət vəkili partiyanın yarandığı mürəkkəb tarixi-siyasi şəraitdən, keçdiyi çətin və şərəfli mübarizə yolundan, Heydər Əliyevin xalqın və dövlətin qarşısında göstərdiyi misilsiz xidmətlərindən danışıb. Ramil Həsən Azərbaycanda dövlətçiliyin möhkəmlənməsi və demokratik prinsiplərin bərqərar olmasının, demokratik, hüquqi, dünyəvi dövlət quruculuğu prosesinin uğurla həyata keçirilməsinin Heydər Əliyevin adı ilə bağlı olduğunu bildirib. Vurğulayıb ki, bu gün Ümummilli Liderimiz Heydər Əliyevin qoyduğu tarixi ənənələr Yeni Azərbaycan Partiyası tərəfindən sədaətlə həyata keçirilməkdədir. Bu tarixi reallığı Möhtərəm Prezidentimiz, Yeni Azərbaycan Partiyasının Sədri Cənab İlham Əliyev qətiyyətli, dönməz siyasəti ilə gerçəkləşdirir və inkişaf etdirir.

Daha sonra millət vəkili çıxışında 29 illik fəaliyyət tarixi olan Ucar Rayon Təşkilatı barədə ətraflı danışıb və vurğulayıb ki, 29 il olduqca ciddi rəqəmdir və Yeni Azərbaycan Partiyasının bölgələrdəki qurumları arasında Ucar rayon təşkilatı fəaliyyəti ilə seçilən təşkilatlardandır. Təşkilat yarandığı ildən, 1993-cü ildən siyasi həmfikirləri bir araya toplayıb və onun üzvləri fəaliyyətləri ilə rayonun ictimai-siyasi, sosial-iqtisadi həyatına mühüm töhfələr verir, aparılan abadlıq-quruculuq, yenidənqurma işlərində yaxından iştirak edirlər.

Millət vəkili çıxışında Yeni Azərbaycan Partiyasının yaranması zərurətindən danışıb və qeyd edib ki, partiyanın yaranması gənc dövlətimiz üçün dönüş nöqtəsi idi: “Müstəqilliyimizin ilk ayları, ilk illəri hamımızın yaxşı xatirindədir. O zamankı iqtidarın müstəqilliyi saxlamağa gücü çatmırdı, eyni zamanda biz müharibə şəraitində yaşayırdıq və cəbhədəki uğursuzluqlar, əlbəttə ki, cəmiyyətimizi böyük sarsıntı içində saxlayırdı. Ölkədə gedən xoşagəlməz proseslər, az qala vətəndaş müharibəsinə çatdıran hadisələr, böhran, iqtisadi tənəzzül, siyasi qeyri-sabitlik müstəqilliyimizə böyük təhlükə yaratmışdı. Belə bir vəziyyətdə parlaq simaların, ziyalıların, cəmiyyətimizdə böyük nüfuz sahibi olan insanların Heydər Əliyevin ətrafında birləşərək Yeni Azərbaycan Partiyasını yaratması zamanın labüd hadisəsi idi. Ulu Öndərin baxışları real konkret proqramlarda öz əksini tapmışdı”.

Millət vəkili Ramil Həsən daha sonra istər 1-ci Qarabağ müharibəsində, istərsə də 44 günlük Vətən müharibəsində savaşımızın zəfərlə nəticələnməsində Ucardan olan qəhrəman oğulların şücaətindən, torpaqlarımızın azadlığı, birlik və bərabərlik uğrunda canlarını fəda edərək şəhid, qazi, veteran və Vətən müharibəsi iştirakçısı olan Ucar sakinlərindən danışıb: “Bu gözəl gündə- partiyamızın yerli təşkilatının 29-cu ildönümündə Vətən uğrunda canlarını fəda etmiş şəhidlərimizi bir daha hörmət və ehtiramla yad edir, dəyərli qazilərimizə uzun və sağlam ömür arzulayıram. Mənim üçün fəxr və qürur hissidir ki, 2020-ci ilin fevral ayında Yeni Azərbaycan Partiyası rəhbərinin etimadı və sizlərin etibar edib verdiyiniz səslə Ucar 91 saylı Seçki Dairəsindən Milli Məclisə depuatat seçildim. Geridə qoyduğumuz iki il yarım ərzində böyük məsuliyyətlə çalışıram ki, partiyamızın Ucar rayon təşkilatının, dəyərli seçicilərimizin, hər bir Ucar sakininin yanında olum, dövlətin və qanunların mənə vermiş olduğu səlahiyyət və imkanlar çərçivəsində vətəndaşların haqq səsini aidiyyəti orqanlar qarşısında qaldırım və mümkün qədər həllinə nail olum. Bəzən hansısa problemlərin həllində çətinliklərlə üzləşirik və bu, təbii ki, hansısa vətəndaşın narazılığına səbəb olur, ancaq bu gün əminliklə deyə bilərəm ki, ədalət qarşısında vicdanım rahatdır, mən Ucarın dəyərli seçiciləri ilə daim birbaşa ünsiyyətdəyəm, onların dərdlərini öz dərdim, sevincini öz sevincim kimi qəbul edirəm. Dövrün tələbinə uyğun olaraq xüsusilə gənc nəslin təhsili, tərbiyəsi, düzgün istiqamətlənməsi naminə daha diqqətli olmağa çalışıram. Çünki Azərbaycanın gənclər siyasətinin təməli Ümummilli lider Heydər Əliyev tərəfindən qoyulub və bu gün də ölkə rəhbəri cənab İlham Əliyev tərəfindən böyük uğurla davam etməkdədir”.

Deputat sonra Yeni Azərbaycan Partiyasının Ucar rayon Təşkilatının sədri Şəhla xanım Abdullayevaya birgə fəaliyyətdə dəstəyinə görə təşəkkürünü bildirib.

Millət vəkili Ramil Həsən Yeni Azərbaycan Partiyasının Ucar rayon Təşkilatının 29-cu ildönümü münasibətilə tədbir iştirakçılarını və partiya üzvlərinin hər birini bir daha təbrik edib, günbəgün genişlənən, üzvlərinin sayı durmadan artan, siyasi müstəvidə rəqibi olmayan Yeni Azərbaycan Partiyasının dövlətin istər siyasi, istərsə də sosial-iqtisadi sahədə apardığı islahatların həyata keçirilməsində bundan sonra da öz töhfələrini verəcəyini vurğulayıb və əmin olduğunu bildirib ki, bu gün Cənubi Qafqazın ən böyük siyasi qüvvəsi sayılan Yeni Azərbaycan partiyası bu sahədə də liderliyi özündə saxlayacaq.

Sonda rayon təşkilatının həyatında fəal iştirak edən bir qrup partiya üzvlərinə Fəxri Fərman və partiya sıralarına yeni qəbul olunmuş üzvlərə üzvlük vəsiqəsi təqdim olundu.