Cənubi Afrika Respublikasının Beynəlxalq Əlaqələr və Əməkdaşlıq naziri Naledi Pandor İsrailin Qəzzaya hücumlarını davam etdirərək Beynəlxalq Ədalət Məhkəməsinin (ICJ) qərarlarını pozduğunu bildirib.
Bu barədə interpress.az xarici mediaya istinadən xəbər verir.
Pandor Efiopiyanın paytaxtı Əddis-Əbəbədə keçirilən Afrika İttifaqı Xarici İşlər Nazirləri İcraiyyə Şurasının iclasında mətbuata açıqlama verib.
Nazir Pandor deyib: “Biz inanırıq ki, Qəzzada, İordan çayının qərb sahilində və hazırda Rəfahda baş verənlər işğal olunmuş Fələstin ərazilərində soyqırımın baş verdiyinə dair Beynəlxalq Ədalət Məhkəməsinə təqdim etdiyimiz iddiaları və İsrailin hərəkətlərini təsdiqləyir. Hökumət dediklərimizin doğru olduğunu açıq şəkildə sübut edir”.
Pandor qeyd edib ki, həqiqətən narahat edən dünyanın İsrailin bu qərarlara məhəl qoymamasına icazə verməsi və heç kimin günahsız mülki insanları qorumaq üçün sülhməramlı qüvvələrin yerləşdirilməsi kimi heç bir tədbir görməməsidir.
Fələstində jurnalistlərin hədəf alınmasını pisləyən Pandor: “Afrikadakı qarşıdurmada 170-dən çox jurnalist öldürülsəydi, bütün dünya və medianın bundan danışacağını təsəvvür edə bilərəm. İsrail bunu edəndə bu, məqbul sayılır”.
Bu həftə Cənubi Afrika Beynəlxalq Ədalət Məhkəməsindən (ICJ) İsrailin Rəfah şəhərinə planlaşdırdığı hücumun səbəb olacağı geniş miqyaslı qətllər, zərər və dağıntılar səbəbindən təcili yeni tədbirlər görməsini istəyib.
