Avropa İttifaqının Xarici Əlaqələr və Təhlükəsizlik Siyasəti üzrə Ali Nümayəndəsi Josep Borrell Aİ-nin Ermənistandakı missiyasında (EUMA) mülki şəxslərin sayının 138-dən 209-a çatdırılacağını açıqlayıb. Bu barədə İnterpress.az xarici mediaya istinadən xəbər verir. Avropa İttifaqının (Aİ) xarici işlər nazirlərinin görüşündən sonra mətbuata açıqlama verən Aİ-nin Xarici İşlər və Təhlükəsizlik Siyasəti üzrə Ali Nümayəndəsi Josep Borrell nazirlərin Ermənistanda xidmət edən mülki missiyada şəxsi heyətin sayının 209-a çatdırılması barədə qərar qəbul etdiklərini bildirib.
Borrell açıqlamasında deyib: “Bildiyiniz kimi, biz hazırda Ermənistanla münasibətlərimizi gücləndirməyə çalışırıq. Mən görürəm ki, Ermənistan bizimlə əməkdaşlığı genişləndirməyin faydalarını hiss edir və biz buna müsbət cavab verməyə hazırıq. İlk addım kimi əməkdaşlığı genişləndirən Xarici Əlaqələr Şurası bu gün Ermənistandakı mülki missiyamızın artırılması və bu sahədə mövcudluğumuzun artırılması barədə qərar qəbul edib. Ermənistanın Azərbaycanla beynəlxalq sərhədinin sabitliyini artırmaq üçün bir yoldur”.
Regionda sülhün əldə olunması üçün tarixi şansın olduğuna inandıqlarını qeyd edən Borrell, Aİ-nin həm Ermənistan, həm də Azərbaycanla işləyərək bu səylərə dəstəyini davam etdirmək əzmində olduğunu vurğulayıb.
Digər tərəfdən, Aİ Komissiyasının sözçülərindən Peter Stano Borrelin açıqladığı “Avropa Sülh Fondu” vasitəsilə Ermənistana dəstəyin məzmununu açıqlayıb.
Ermənistan 2022-ci il dekabrın 27-də Aİ-nin Xarici Əlaqələr və Təhlükəsizlik Siyasəti üzrə Ali Nümayəndəsi Borrell-ə məktub yazaraq, Aİ-ni ölkəsində mülki missiya təyin etməyə dəvət edib. Aİ Şurası 2023-cü il yanvarın 23-də missiyanın yaradılması barədə qərar qəbul edib.
Aİ-nin Ermənistanın Azərbaycan sərhədində sabitlik və normallaşma səylərinə töhfə vermək üçün təyin etdiyi mülki missiya fevralın 20-də işə başlayıb.
