İndoneziyanın Sulavesi adasındakı nikel zavodunun əritmə sobasında baş verən partlayış nəticəsində ölən işçilərin sayı 18-ə yüksəlib. Bu barədə İnterpress.az xarici mediaya istinadən xəbər verir. Polis rəsmiləri hadisə ilə bağlı istintaq tamamlanana qədər fabrikin fəaliyyətinin dayandırıldığını bildiriblər.
Səlahiyyətlilər həyatını itirən 18 işçidən 8-nin çinli olduğunu, 44 yaralı işçinin isə müalicəsinin davam etdiyini bildirib.
Sulavesi polis rəisi Agus Nugroho, ölümlərə obyektin sahibi olan PT IMIP şirkətinin səhlənkarlığının səbəb olub-olmadığını müəyyən etmək üçün bir qrup yaradıldığını bildirib.
Çin Xarici İşlər Nazirliyinin sözçüsü Mao Ning, dünən verdiyi mətbuat şərhində, ölənlərə görə başsağlığı verdi və İndoneziyadakı səlahiyyətlilərlə sıx əməkdaşlıq etdiklərini söyləyib.
Dekabrın 24-də müəssisənin əritmə sobasında baş verən partlayışda ilkin məlumatlara görə, 13 işçi ölüb, 38 işçi yaralı, bəziləri ağır olmaqla xəstəxanaya yerləşdirilib.
Hadisə ilə bağlı aparılan araşdırmanın ilkin nəticələrinə görə, əritmə sobasının altında partlayıcı mayelərin tapıldığı və sızmanın oksigen çənlərində partlayışa səbəb olduğu qeyd edilib.
