ABŞ-da aparılan araşdırmalar nəticəsində süni intellekt (AI) və qabaqcıl hesablama sistemlərindən istifadə etməklə, batareyalarda litium istifadəsini əhəmiyyətli dərəcədə azalda bilən material aşkar edilib. Bu barədə İnterpress.az xarici mediaya istinadən xəbər verir. Microsoft və ABŞ Enerji Departamentinin Sakit Okean Şimal-Qərb Milli Laboratoriyası (PNNL) tərəfindən aparılan araşdırmalar, batareyalarda litiumun istifadəsində perspektivli irəliləyişlərə işarə edir.
İki təşkilat mürəkkəb elmi və riyazi əməliyyatları həll etmək üçün çoxlu sayda kompüterləri birləşdirərək qabaqcıl süni intellekt və yüksək məhsuldar hesablamalardan istifadə edirdi.
Süni intellekt və superkompüterlərdən istifadə edərək, bir həftədən az müddət ərzində 32 milyon potensial qeyri-üzvi material 18 perspektivli nümunəyə endirildi.
Bildirilib ki, ənənəvi laboratoriya tədqiqat üsulları ilə bu skrininq prosesi 20 ildən çox vaxt apara bilər.
Tədqiqat göstərir ki, süni intellekt və qabaqcıl hesablama sistemləri vasitəsilə kəşf edilən material batareyalarda litium istifadəsini 70 faizə qədər azalda bilər.
Sözügedən material kəşf edildiyi gündən lampaları işıqlandırmaq üçün istifadə edilmişdir.
Microsoft-un icraçı vitse-prezidenti Ceyson Zander bildirib ki, böyük texnologiya şirkətinin missiyalarından biri “250 illik elmi kəşfi növbəti 25 ilə sıxışdırmaq”dır.
“Ağ qızıl” kimi tanınır
Bazar dəyərinə və gümüşü rənginə görə tez-tez “ağ qızıl” olaraq adlandırılan litium, elektrikli avtomobillərdən tutmuş smartfonlara qədər bir çox nəqliyyat vasitəsini enerji ilə təmin edən təkrar doldurulan batareyaların əsas komponentlərindən biri kimi diqqət çəkir.
Beynəlxalq Enerji Agentliyinin məlumatına görə, elektriklə işləyən avtomobillərə tələbat artdıqca dünya 2025-ci ildə material qıtlığı ilə üzləşə bilər.
Yenə ABŞ Energetika Nazirliyinin məlumatına görə, 2030-cu ilə qədər litium-ion batareyalara tələbatın 10 dəfəyə qədər artacağı gözlənilir.
