Aİ Şurası Rusiyanın məhdudiyyətlərindən sonra Ermənistan məhsullarına ticarət güzəştlərini dəstəkləyib.
İnterpress.az xəbər verir ki, bu barədə Avropa İttifaqı Şurası məlumat yayıb.
Aİ Şurası Ermənistan məhsullarının Avropa İttifaqı bazarına ixracının müvəqqəti liberallaşdırılmasını razılaşdırıb.
Tədbirlər Ermənistanın Aİ-yə ixracının təxminən 80 faizini əhatə edəcək və geniş çeşiddə məhsullara tətbiq olunan idxal rüsumlarının iki il müddətinə dayandırılmasını nəzərdə tutur.
Güzəştlər Ermənistanın Rusiyaya ixrac etdiyi təzə meyvə, tərəvəz və bitkilərin demək olar ki, 99 faizinə, içkilər və spirtli içkilərin isə 91 faizindən çoxuna şamil olunacaq.
Aİ Şurası qərarın Rusiyanın tətbiq etdiyi ticarət məhdudiyyətlərindən sonra Ermənistana dəstək məqsədi daşıdığını bildirib.
Avropa Parlamentinin təklifi sentyabrda nəzərdən keçirəcəyi gözlənilir.
Yekun təsdiqdən sonra qaydalar Aİ-nin Rəsmi Jurnalında dərc edildiyi gündən sonrakı gün qüvvəyə minəcək.
Xuraman Etibarlı
İnterpress.az
