Rusiya prezidenti Vladimir Putinin təyyarəsini Birləşmiş Ərəb Əmirliklərinə (BƏƏ) səfər edərkən raketlərlə təchiz edilmiş 4 ədəd Su-35 qırıcısı müşayiət edib. Bu barədə İnterpress.az xarici mediaya istinadən xəbər verir. Rusiya Müdafiə Nazirliyinin yayımladığı videoya görə, Putinin olduğu İL-96 model prezident təyyarəsini müşayiət etmək üçün döyüş təyyarələri də havaya qalxıb.
Putinin təyyarəsinin hər tərəfində iki nəfərdən ibarət qruplar halında yerləşən Su-35S model döyüş təyyarələrinin hava-hava hədəflərini vura bilən R-73 və R-77 raketləri daşıdığı görülüb.
Putin paytaxt Əbu-Dabiyə enənə qədər Rusiya döyüş təyyarələri onun səfərini müşayiət etməyə davam edib. Nazirlikdən verilən açıqlamada qeyd olunub ki, müxtəlif siniflərdə standart aviasiya silahları ilə təchiz edilmiş Su-35S beynəlxalq uçuş boyu prezident təyyarəsinə hava dəstəyi verib.
Açıqlamada təyyarələrin ağır yağış və güclü küləklə çətin hava şəraitində hava limanından havaya qalxdığı və döyüş təyyarələrinin birinci dərəcəli pilotlar tərəfindən istifadə edildiyi bildirilib.
