yunun 3-də Müsavat Partiyası Mərkəzi İcra Aparatı adından yayılan bir bəyanat gündəmə bomba kimi düşdü. Bəyanat mühacir statusu almaq üçün partiyanın adından istifadə edənlərlə bağlı idi.
“Yeni Müsavat” Müsavat Partiyası başqanının müavini, Mərkəz İcra Aparatının rəhbəri Gülağa Aslanlı tərəfindən hazırlanan və redaksiyamıza təqdim olunan sözügedən bəyanatı təqdim edir: “”Müsavat Partiyasının ölkədə və xaricdə nüfuzundan istifadə edərək, bəzi işbazlar müxtəlif yollarla xarici ölkələrə mühacirət edən insanlara, o ölkələrdə oturum almaqdan ötrü Müsavat Partiyası adından saxta sənədlər verirlər.
Belə hallar haqda bizə məlumat verildikdə partiya tərəfindən gərəkli addımlar atılmasına baxmayaraq, mühacirlərin təhlükəsizliyi naminə bu məsələlər bizim tərəfimizdən ictimailəşdirilməyib. Lakin son vaxtlar bu tipli məsələlərdən biri bizdən asılı olmayaraq ictimailəşdirildiyi, partiyanın və tanınmış hüquq müdafiəçilərindən birinin adı yersiz hallandırıldığı üçün biz məsələyə aydınlıq gətirməyi zəruri sayırıq.
Avropada olan mühacirlərdən Elnur Aydın oğlu Mirzəyevin adından Belçika ölkəsinin Miqrasiya İdarəsinə təqdim edilən Müsavat Partiyasının vəsiqəsinin, arayışın və “Elnur Mirzəyev barədə” sənədin Müsavat Partiyasına göndərilmiş surətləri tərəfimizdən araşdırılmış və saxta olduğu təsdiq olunmuşdur.
Müsavat Partiyası tərəfindən E.Mirzəyevin adına verilməsi iddia edilən Müsavat Partiyasının 1216 saylı vəsiqəsi Müsavat Partiyasına məxsus deyil və saxtadır.
Müsavat Partiyası tərəfindən verildiyi iddia olunan 10 noyabr 2014-cü il tarixli 92 saylı arayış partiyanın son illərdə istifadə etdiyi xüsusi blankda yazılmayıb, Müsavat Partiyası başqanının müavini kimi mənim adım və soyadım göstərilsə də, mənə məxsus imza və partiyanın möhürü saxtalaşdırılıb.
Müsavat Partiyası tərəfindən verildiyi iddia olunan 01 aprel 2015-ci il tarixli 314 saylı “Elnur Mirzəyev barədə” sənəd də yuxarıda göstərilən formada saxtalaşdırılıb (Arayış partiyanın son illərdə istifadə etdiyi xüsusi blankda yazılmayıb, Müsavat Partiyasının başqan müavini, İcra Aparatının rəhbəri kimi mənim adım və soyadım göstərilsə də, mənə məxsus imza və partiyanın möhürü saxtalaşdırılıb).
Bizə təqdim olunan arayış və “Elnur Mirzəyev barədə” sənədin surətinin araşdırılması zamanı orada göstərilən tarixlərdə və saylarda Müsavat Partiyası tərəfindən hansısa bir arayışın və sənədin verilmədiyi aşkar olunub.
Yaydığımız bu bəyanatda Müsavat Partiyasının istifadə etdiyi xüsusi blankın, möhürün və mənim şəxsi imzamın orijinalı ilə Elnur Mirzəyevlə bağlı bizə təqdim olunan sənədlərdə istifadə olunan xüsusi blankı, möhürü və imzamı müqayisə edib, fərqləri görmək mümkündür.
Beləliklə, Belçika Miqrasiya İdarəsinə Elnur Aydın oğlu Mirzəyevin adından təqdim edilən Müsavat Partiyasının vəsiqəsinin, arayışın və “Elnur Mirzəyev barədə” sənədin Müsavat Partiyasına ünvanlanan surətlərinin tədqiqi nəticəsində bu sənədlərin Müsavat Partiyası tərəfindən deyil, işbazlar tərəfindən saxta yolla hazırlandığını bir daha bəyan edirik\”.
Bəyanata həmçinin Müsavat Partiyası Mərkəzi İcra Aparatı adından imzalanan və möhürlənən xüsusi blank və Belçika ölkəsinin Miqrasiya İdarəsi tərəfindən Müsavat Partiyasına ünvanlanan sənədlərin surətləri də əlavə olunub.
“Yeni Müsavat” xatırladır ki, ötən ay Avropadakı mühacirlərin həyatından yazı silsiləsi hazırlamaq üçün ezam olunmuş əməkdaşımız da layihə çərçivəsində E.Mirzəyevlə görüşüb, ondan müsahibə almışdı. E.Mirzəyev həmin müsahibəsində əməkdaşımıza G.Aslanlının, həmçinin partiya rəhbərliyində təmsil olunan şəxslərin onu yaxşı tanıdığını, amma hüquq müdafiəçisi Eldar Zeynalovun onun barəsində Belçika Miqrasiya İdarəsinə həqiqətə uyğun olmayan məlumatlar verdiyini bildirmişdi.
Məlum bəyanatdan sonra “Yeni Müsavat” yenidən E.Mirzəyevlə əlaqə saxladı. E.Mirzəyev dedi ki, bu bəyanat partiyanın onu aldatdığını sübut edir: “Mən partiyaya yazılan gün rəhbərliyə demişdim ki, mənim burdan getmək ehtimalım var. Partiyaya üzv olmaq üçün külli miqdarda pul vermişəm. Konkret rəqəm lazımdırsa, deyim. 1800 manat. Bu hadisə 2011-ci ildə olub. Amma vəsiqəni köhnə tarixlə – 2008-ci ilə verdilər ki, inandırıcı olsun. Özləri də mənə dedilər ki, ”2011-ci ilin noyabr ayındakı mitinqlərdə iştirak elə, şəkillərin olsun. O halda mühacirət statusu almağın daha asan olacaq\”. Onlar özləri orda ticarətlə məşğuldular. Maskaları cırılanda isə məni güdaza vermək istədilər\”.
Müsahibimiz dedi ki, G.Aslanlı tərəfindən bu gün (dünən-red.) yayılan və saxta kimi təqdim edilən iki arayışı elə onun özündən alıb: “Hər birinə görə 300 manat ödəmişəm. Lazım olsa sübutları da təqdim edəcəyəm. Mesajlar, facebook yazışmaları, vatsap yazışmaları var əlimdə”.
E.Mirzəyev dedi ki, onun oturum alması məsələsində heç bir dəyişiklik yoxdur. Müsahibimizin sözlərinə görə, hələ ki növbəti müsahibə baş tutmayıb: “Belçika dövləti oturum verməsə də, həyatımızı yaşayacağıq. Pislikləri özlərinə qalsın. Amma mən əlimdəki bütün sənədləri Qənimət Zahidə verəcəm, qoy o bu mövzunu ”Azərbaycan Saatı\” verilişində yayımlasın. Axı bu bəyanatı yaymaqla nə oldu? Bunun adı pislikdir, başqa adı yoxdur. İnsanlara saxta sənədlər satmısız və mən yeganə adam deyiləm. Sizin qəzetinizə müsahibənizdən sonra Eldar Zeynalov Mirzə Sakitə müraciət edib ki, niyə onun adını çəkmişik. Halbuki o adam mənimlə bağlı miqrasiya idarəsinə yalan məlumatlar verirdi. Eldar Zeynalov dövlətə satılmış hüquq müdafiəçisidir. İndi Müsavat Partiyası başqanının müavini onu hörmətli adam kimi təqdim edir\”.
Müsahibimiz bu məsələni sona qədər araşdıracağını və Müsavatda saxta sənəd alveri ilə məşğul olanların maskasını cıracağını dedi: “Hamı bilir ki, 6-7 ildir Müsavat Partiyası bu alverlə məşğuldur. Sadəcə, indi işləri üzə çıxdı, məni qurban etdilər. Mənsə bu məsələni belə qoymayacam”.
G.Aslanlı “Yeni Müsavat”a açıqlamasında E.Mirzəyevin dediklərini böhtan adlandırdı. Müsahibimiz ümumiyyətlə bu adamı görmədiyini dedi: “Nə Bakıda, nə də başqa bir yerdə. Doğrudur, onunla mənim aramada inboks yazışması olub. O yazışmada da qeyd edib ki, Müsavatın üzvüdür. Soruşmuşam ki, Müsavatın üzvüsüzsə, hansı təşkilatın üzvüsən? O da deyib ki, özümü Novxanı müsavatçısı hesab edirəm. Mən də demişəm ki, Müsavatda ”Novxanı müsavatçısı\” anlayışı yoxdur. Ya Binəqədi, ya da hansısa başqa rayon müsavatçısı ola bilər.
Sonra o mənə yazıb ki, məni Tofiq Yaqublu partiyaya qəbul etdirib. Mən də bunu vəkili vasitəsilə Tofiq bəydən soruşmuşam. O da deyib ki, əgər partiyaya üzv olmaq üçün onun ərizəsi yoxdursa, qəbul etdirmək söhbəti olmaz. Mən Tofiq Yaqubluya özüm qədər inanıram. O belə iş görməz\”.
Müsahibimizin sözlərinə görə, bu dəqiqləşdirmədən sonra E.Mirzəyevə “sizin Müsavata üzv qəbul olunmanız təsdiq olunmur, siz Müsavatın üzvü deyilsiz”, cavabını verib. G.Aslanlı dedi ki, son olaraq Belçika Miqrasiya İdarəsindən Müsavata ünvanlanan müraciət də bu saxtakarlığı bütün detalları ilə üzə çıxarıb: “Bəli, ortada bir vəsiqə var. Amma bugünkü bəyanatda da göstərmişəm ki, Müsavatda belə vəsiqə nömrəsi yoxdur. Müsavatın istifadə etdiyi blankın forması tamam başqadır. Möhür tamam başqadır. Ona mənim adımdan verilən arayış və sənəddəki imzalar mənə məxsus deyil. Ekspertizaya verib, təsdiqləmək mümkündür. Kimsə saxta sənəd verib. Ya özü düzəldib, ya da kimsə verib belə saxta sənədi. Başqa variant yoxdur. İstifadə edilən möhür də Müsavatın deyil. Mən faktları təqdim etmişəm. O adam xəyallar və nağıllarla nələrsə danışır. Mən şəxsən öz adımdan deyirəm ki, onu heç vaxt görməmişəm. Vasitəçisi kim olubsa, onu da görməmişəm”.
G.Aslanlı dedi ki, qarşı tərəfin ona pul verməsi ilə bağlı irəli sürdüyü iddia ağ yalandır. Müsahibimiz hesab edir ki, bunu sübut etmək istəyən şəxs məhkəməyə müraciət etsin: “Görək orda kim kimə nəyi sübut edəcək. Cəmiyyətdə məni tanıyanlar bilir iki, heç vaxt əqidəmi pula satmamışam. Mənim adıma yapışan şey deyil. Versin məhkəməyə. Dediyində həqiqət varsa, mənə pul verdiyini sübut etsin məhkəmədə.
Elə olsa qanun qarşısında, qanuna tabe olmağa və Müsavat üzvləri qarşısında da üzr istəməyə hazıram. Məni pulla almağa cəhd edən hakimiyyət buna nail olmayıb. Heç kimin 700 manatına qalan kişi deyiləm. Belə şərlə məşğul olmaqdansa özünə başqa peşə tapsın. Mən faktları ortaya qoymuşam. İmzam, möhür, blank uyğun gəlirmi? Yox. Fakt budur”.
Müsavat başqanının müavini bu işdə kimin əli ola biləcəyi ilə bağlı sualı da cavablandırdı. Dedi ki, ümumiyyətlə, partiyada heç kim onun imzasını ata və ümumiyyətlə belə saxta sənəd verməyi boynuna götürə bilməz: “O sənəd Avropada hazırlanıb.
2006-cı ildə də belə sənəd ortaya çıxmışdı. Onun üzərində Yasamal rayon təşkilatının möhürü və Vurğun Əyyubun imzası vardı. Həmin vaxt biz bunu dəqiqləşdirdik. Məlum oldu ki, nə bu imza Vurğun Əyyuba məxsusdur, nə də təşkilatdan belə bir sənəd verilib. Belə saxta iş bacaranların olması barədə məlumatımız var. Böyük ehtimalla xaricdə olan işdir. Müsavat Partiyasına aidiyyəti yoxdur. Lap Azərbaycanda belə işbazlar olsa da, onlar Müsavat Partiyasından kənardadırlar”.
İnterpress.az
