Məmdaninin mer seçilməsi ABŞ-də yeni siyasi mərhələnin başlanğıcı kimi qiymətləndirilir. O, ABŞ siyasətində inklüziv və sosial yönümlü liderliyin simvoluna çevrilmişdir.
Zöhran Məmdani Uqandanın paytaxtı Kampalada doğulmuş hind əsilli amerikalı siyasətçidir. O, Demokratik Sosialist prinsiplərinə sadiq qalaraq ABŞ siyasətində fərqli bir perspektiv təqdim etməyi nəzərdə tutur.
Məmdani, ABŞ-nin ən böyük şəhərinin ilk müsəlman meri seçilmişdir. 2025-ci ilin iyun ayında keçirilmiş ilkin seçkilərdə qalib gələrək Demokrat Partiyasının namizədi olmuşdur. Noyabrın 4-də keçirilmiş əsas seçkilərdə isə seçicilərin 50%-dən çoxunun səsini qazanaraq rəqiblərini üstələyib.
Onun ABŞ-nin 111-ci meri seçilməsi şəhər siyasətində və ölkə tarixində əhəmiyyətli bir dönüş nöqtəsi hesab olunur. Məmdani siyasətdə öz prinsipial mövqeyini qoruyaraq həm tərəfdarların, həm də tənqidçilərin diqqət mərkəzində olmuşdur.
O, beynəlxalq səviyyədə İsrail–Fələstin münaqişəsində Fələstin tərəfinin hüquqlarını müdafiə edir. ABŞ-nin İsrailə yönəlmiş siyasətini akademik və siyasi baxımdan tənqid etməsi onun xarici siyasətə dair mövqeyini əks etdirir. Bundan əlavə, Məmdani “Boykot, Təcrid və Sanksiyalar” (BDS) hərəkatını açıq şəkildə dəstəkləyərək beynəlxalq ədalət çağırışlarını müdafiə edir.
Məmdani Nyu-York şəhərinin meri seçildikdən sonra onun çağırışları ABŞ prezidentinə qarşı açıq siyasi meydan oxumağa yönəlmişdir. Prezident Donald Tramp onu Demokrat Partiyasının gələcək “kommunist” üzvü kimi qınamış və Nyu-York şəhərinə maliyyə dəstəyini dayandırmaqla hədələmişdir. Bununla da rəqibini nüfuzdan salmağa çalışmışdır. Məmdaninin qələbəsi və Trampın bu qələbəyə reaksiyası ABŞ-da şəhər və federal səviyyədə siyasi qarşıdurmaların intensivliyini nümayiş etdirir.
O, eyni zamanda sosial ədalət və bərabərlik prinsiplərinə böyük önəm verən siyasətçi kimi tanınır. Onun rəhbərliyi altında şəhər idarəçiliyində inklüziv siyasətlərin tətbiqi və müxtəlif icmaların hüquqlarının qorunması prioritet təşkil edir. Məmdani həmçinin ətraf mühitin qorunması və davamlı infrastruktur layihələrinin inkişaf etdirilməsinə dəstək verir.
Onun beynəlxalq siyasətdə tutduğu mövqeyi yalnız ABŞ-ın daxili siyasətinə təsir göstərmir, həm də qlobal miqyasda insan haqları və ədalət prinsiplərinin təşviqinə yönəlmişdir. Beləliklə, Məmdaninin siyasi fəaliyyəti həm lokal, həm də qlobal səviyyədə yeni idarəçilik standartlarının formalaşmasına töhfə verə bilər.
Dərya Abdullayeva,
Politoloq
