Belçikanın Qəzzaya hava yolu ilə çatdırılması üçün göndərdiyi humanitar yardım materiallarını daşıyan hərbi təyyarə İordaniyaya yola düşüb.
Bu barədə interpress.az xarici mediaya istinadən xəbər verir.
İçərisində ərzaq, gigiyena məhsulları və tibbi ləvazimatlar olan bağlamalarla yüklənmiş A400M tipli hərbi nəqliyyat təyyarəsi yerli vaxtla saat 13.30-da Brüsselin Melsbroek hərbi hava limanından yola düşüb.
Təyyarəni xarici işlər naziri Hadja Lahbib, müdafiə naziri Ludivine Dedonder və inkişaf əməkdaşlığı naziri Karolin Gennez yola salıblar.
500 milyon avro dəyərində təchizat daşıyan təyyarə ilk olaraq Belçika Fövqəladə Hallara Müdaxilə Qrupunun (B-FAST) müşayiəti ilə İordaniyaya çatacaq. Daha sonra İordaniyanın əməkdaşlığı ilə balalar paraşütlə Qəzzanın şimalındakı təyin olunmuş nöqtələrə endiriləcək.
İsrailin yardımın bu yolla çatdırılmasını gözləyən mülki şəxslərə hücumundan sonra Belçika martın 1-də Qəzzaya humanitar yardım göndərəcəyini açıqlayıb. Fevralın 29-da İsrailin humanitar yardım gözləyən fələstinlilərə hücumu nəticəsində 118 nəfər həyatını itirib.
İsrailin 7 oktyabr 2023-cü ildən bəri Qəzza zolağına təşkil etdiyi hücumlarda ən azı 13 min 230-u uşaq, 8 min 860-ı qadın olmaqla 30 min 534 fələstinli həlak olub, 71 min 920 nəfər isə yaralanıb. Dağıntılar altında hələ də minlərlə ölü olduğu bildirilərkən, insanların sığındığı xəstəxana və təhsil müəssisələri hədəf alınaraq mülki infrastruktur da məhv edilir.
