İnsan Hüquqları və Qanunçuluğun Müdafiəsi İctimai Birliyi Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin maliyyə dəstəyi ilə “Məişət zorakılığına qarşı mübarizə məqsədilə ictimai müzakirələrin keçirilməsi” adlı layihənin icrasını davam etdirir.
4 ay müddətində Bakı şəhəri, Masallı, Yardımlı, Biləsuvar, Lənkəran və Şamaxı rayonlarında həyata keçiriləcək layihənin məqsədi regionlarda məişət zorakılığına qarşı mübarizəyə dair təşəbbüslərin irəli sürülməsi, “Məişət zorakılığının qarşısının alınması haqqında Qanun”un təbliği və işləmə mexanizmlərinin tapılması, məişət zorakılığı probleminin ictimailləşdirilməsindən ibarətdir. Eyni zamanda, müxtəlif strukturların problemin həlli istiqamətində birgə fəaliyyətlərinin tənzimlənməsi vasitəsilə bu problemin aradan qaldırılmasına kömək etmək də layihənin məqsədidir.
Layihə çərçivəsində növbəti tədbir avqustun 5-də Masallı rayonunda keçirilib. 24 nəfərin iştirak etdiyi tədbiri təlimçilər Əntiqə Qurbanova və Nabat Qəniyeva aparıb.
Əvvəlcə, iştirakçılara 2 vərəq paylanaraq 2 suala qısa cavab vermələri xahiş olunub;
1. Sizcə məişət zorakılığı nədir və onu kimlər törədir?
2. Məişət zorakılığı törədən şəxslər cəzalandırılırmı və necə? Məişət zorakılığı qurbanları nə edirlər və nə etməlidirlər- hara, kimə və necə müraciət etməlidirlər?
Sonra cavablar toplanıb və müzakirə edilib.
Tədbirdə “Məişət zorakılığının qarşısının alınması haqqında Qanun”un təqdimatı edilib.
Müzakırələr bu mövzular ətrafında olub.
– Azərbaycanda məişət zorakılığı problemi, onun fəsadları,
– Problemin həlli üçün qanunda nəzərdə tutulmuş müddəalar,
– Qanunun tətbiq edilməsi üçün mexanizmlərin olmaması,
– Zorakılığa məruz qalmış insanların hara və necə müraciət etməsi,
– Bələdiyyələrin nəzdində Qadın Otağının təşkili təşəbbüsü.
Eyni zamanda iştirakçıların fikir və təklifləri müzakirə edilib, məişət zorakılığına qarşı mübarizəyə dair təşəbbüslər dinlənilib.
Sonda kiçik qruplarla iş həyata keçirilib.
Hər qrupa 2 sual verilib. İştirakçılar birlikdə işləyiblər və hər qrupdan 1 nəfər təqdimat edib.
Tədbirdən sonra müzakirələr çay süfrəsi ətrafında da davam etdirilib.
